АҞӘА, мшаԥы 3 - Sputnik. Аԥсны иаиуит апатриоттә стендқәа ахԥатәи ахәҭа.
Асахьаркыратә цхыраагӡақәа рызкуп Аџьынџьтәылатә еибашьра Дуӡӡа, ИАО, Аԥсны жәлар Рџьынџьтәылатә еибашьра рлахәылацәа. Урҭ ашколқәа зегьы ирызшахоит.
Астендқәа Урыстәыла иҟаҵан – ари Аԥсны Аҵара аминистрреи Урыстәыла аҳәынҭқарра ахада игрантқәа рфонди русеицура иалҵшәоуп.
Зегьы ааидкыланы 918 цыра ыҟоуп.
Уажәазы Аԥсны раԥхьатәи ахада Владислав Арӡынба изкны амольберт аԥҵара иаҿуп ҳәа иҳәеит Аҵара аминистрра апресс-маӡаныҟәгаҩ Аслан Қәҭелиа. Аԥхьаҟа иазгәаҭоуп аԥсуа поетцәеи ашәҟәыҩҩцәеи ирызку абас еиԥш иҟоу аматериалқәа раԥҵара.