АҞӘА, мшаԥы 3 - Sputnik. Сергеи Кириенкои Бадра Гәынбеи Тҟәарчал ақалақь аҿы иҟоу амемориал аҿы ашәҭ шьыҵәрақәа шьҭарҵеит.
Аԥсныҟа иусуратә ныҟәара аҳәаақәа ирҭагӡаны Урыстәыла ахада Иусбарҭа анапхгаҩы актәи ихаҭыԥуаҩ Сергеи Кириенко Аԥсны ахада Бадра Гәынба дицны Тҟәарчал Афырхацәа раллеиа иаҭааит. Уаҟа Аԥсны жәлар Рџьынџьтәылатә еибашьреи Аџьынџьтәылатә еибашьра Дуи рҿы иҭахаз рбаҟа аҿаԥхьа ашәҭ шьыҵәрақәа шьҭарҵеит.
Аусмҩаԥгатә Аԥсадгьыл ахьчаҩцәа рфырхаҵара аҳаҭыр ду ақәҵара иадырганы иҟалеит. Афырхацәа ргәалашәара – ажәлар рхаҿра иахәҭахадоуп, амемориалтә комплексқәа реиқәырхара аурыс-аԥсуа гуманитартә усеицураҿы зегь раԥхьа ишгылоу иаанхоит.
Иахьазы Аԥсны 82-қыҭа ҩ-еибашьрак ирылахәыз аибашьцәа рбаҟақәа реиҭашьақәыргыларазы иҷыдоу апрограмма иалахәуп. Урыстәыла ахада игрантқәа рфонд иҟанаҵаз адгылара абзоурала, амемориалқәа реиҭашьақәыргыларазы 77,5 миллион мааҭ инареиҳаны ари аус иазоужьуп. Аҭоурыхтә гәалашәара аиқәырхаразы аусура ԥхьаҟагьы иацҵахоит.