АҞӘА, мшаԥы 4 - Sputnik. Аԥсны Жәлар Реизара-Апарламент аҭыԥантәи ахаланапхгаратә усбарҭақәа рдепутатцәа рымчра аамҭа абҵара 8 рҟынӡа иацнаҵеит.
Азакәан апроект рыдыркылеит изаамҭанытәим асессиа аҩбатәи аҵыхәтәантәи аԥхьарала.
Адепутатцәа ргәаанагарала, уи хымԥадатәиуп "алхрақәа рыбжьара аамҭа аизырҳаразы".
Уи адагьы, аилыркааратә шәҟәаҿы иазгәаҭоуп аҭыԥантәи ахаланапхгаратә усбарҭақәа рахь алхрақәа атуристтә аамҭахәҭа аартра иақәшәоит ҳәа.
Уаанӡатәи алхрақәа мҩаԥысит мшаԥымза 11 2021 шықәсазы. Аԥсны Ақалақьтәи араионтәи еизара адепутатцәа ԥшьышықәса аҽҳәара рыҭан иалырхуеит.