АҞӘА, мшаԥы 4 - Sputnik. Апроект "Урыстәылеи Аԥсни ркультуратә усмҩаԥгатәқәа реимдара" аҳәаақәа ирҭагӡаны афортопианотә дует "Piano Duo- Аԥсни" аҳәынҭқарратә камертә оркестри мшаԥы 7 рзы Самара иқәгылоит, абри атәы аанацҳауеит акультура аминистрра.
Адует алахәылацәа – Аԥсны жәлар рартист Нинель Бжьаниаԥҳаи Аԥсны зҽаԥсазтәыз артист Гәлиза Аҩӡԥҳаи. Урҭ азыӡырыҩцәа ирыдыргалоит аклассикатәии ҳаамҭазтәии арҿиамҭақәа.
Апроект хықәкыс иамоуп акультура аусхк аҿы аусеицура арӷәӷәареи адгылара аҭареи. Иара еиҿнакааит "Росконцерт" Урыстәылеи Аԥсни рыцхыраарала.