АҞӘА, мшаԥы 8 - Sputnik. Акапиталтә ргылараз аусбарҭа аҟазауаа ааха зауз Риҵатәи амҩахәҭаҿы агеодезиатәи агеологиатәи ҭҵаарақәа мҩаԥыргеит.
Уажәазы дара ажра ржуеит, уи азы аҭыԥ ахь иҷыдоу атехника нагоуп.
"Аҳауа аҭагылазаашьа ишалнаршалак еиԥш адгьылкылҵәара, агәашьақәа рықәыргылара рзы аусурақәа ҳалагоит, уи ашьҭахь аҵыргәаҭӡы шьҭыххоит", — иҳәеит Акапиталтә ргылара аусбарҭа аиҳабы Ҭемыр Агрба.
20-20 метра зыҩаӡара ыҟоу аҵаргәаҭыӡқәа ҩба рышьҭыхра хымԥадоуп. Аусураз иазыԥхьагәаҭоу ахарџь 18 млн мааҭ ҳәа ишьоуп.