АҞӘА, мшаԥы 8 - Sputnik. Аԥснынтәи хәҩык астудентцәа Пиатигорск Адыррақәа рцентр "Машук" аҿы имҩаԥысуа арҵаратә программа "Аԥхьаҟатәи алабораториа" рхы аладырхәуеит.
Апрограмма азкуп адунеизегьтәи аиҭакрақәа рҳәаақәа ирҭагӡаны Кавказ ԥхьаҟатәи аԥеиԥш алацәажәара. Алҵшәақәа инарықәыршәаны, Кавказ аԥсҭазаареи аҿиареи еиуеиԥшым рхырхарҭақәа ирызку аподкастқәа раԥҵара азԥхьагәаҭоуп.
Имҩаԥгахоит атехнологиатә прогресси иԥасабаратәым аинтеллекти ирызку алекциақәеи аицәажәарақәеи.
Астудентцәа ралхра еицлабрала имҩаԥысит. Ари Аԥсны аҵарадырра аминистрреи "Машуки" русеицура аҳәаақәа ирҭагӡаны Аԥсны азы аҷыдалкаа ҟаҵан.