АҞӘА, мшаԥы 26 - Sputnik. Аҟәа Ареспубликатә хәышәтәырҭаҿы ангиографиатә операциатә уадазы ахыбра апроект ала аусурақәа актәи ретап хыркәшоуп.
"Уажәазы аҭӡамцқәа рыргыларазы амаҭәахәқәа раагара иаҿуп. Аоперациатә уадазы иҷыдоу арентгенхьчаратә материалқәа ҿаҵоуп. Иара убас аоперациатә уадазы амедицинатә ҳауаҩнарсразы амаругақәа ралхра мҩаԥысуеит", — иҳәеит Акапиталтә ргылара аусбарҭа аиҳабы Демир Гамисониа.
Уаанӡа агәабзиарахьчара аминистр Едуард Быҭәба иҟаиҵаз адыррақәа рыла, ангиограф ԥхынгәымза 1 рҟынӡа ишьақәыргылахоит, амаруга ахаҭа рашәарамза азбжазы ареспубликахь иааргоит.
Есышықәса 750-ҩык рҟынӡа Аԥсны ауааԥсыра аҳәаанырцәҟа ицоит амедицинатә цхыраара роурц, мамзаргьы агәы-да чымазарақәа рыԥшааразы. Урыстәыла 100 миллион мааҭк инареиҳаны зыхә ыҟоу акоронарографиазы амаругақәа раахәараҿы Аԥсны ацхыраара анаҭеит.