АҞӘА, лаҵара 9 - Sputnik. Владимир Путин Бадра Гәынба Аиааира Ду 80 шықәса ахыҵра идиныҳәалеит. Абри атәы аанацҳауеит атәыла ахада ипресс-маҵзура.
"Урыстәылеи Аԥсни ртәылауаа рабацәеи рабдуцәеи ҳаҭырқәҵарала иргәалашәоит – анацизм еилаԥызххааз хыԥхьаӡара рацәала афронт аҿы иҭахаз аибашьцәеи атыл аҿы аџьабаа збаз ауааҧсыреи", – ҳәа аҳәоит атекст аҿы.
Урыстәыла ахада аиашьаратә еиҩызареи аицхыраареи ртрадициақәа аринахысгьы атәылақәа реизыҟазаашьақәа рыҿиара иацхраауеит ҳәа агәра шиго азгәеиҭеит. Уи Аԥсны инхо аветеранцәа ирзеиӷьеишьеит агәабзиара, агәалаҟазаара бзиа, ақәра ду.