АҞӘА, лаҵара 24 — Sputnik. Атуризм аминистрра Аԥсны мрагыларатәи ахәҭа атуризм аҿиаразы аусурақәа мҩаԥнагоит ҳәа аанацҳауеит аусбарҭа апресс-маҵзура.
Аусбарҭа аиҳабы Асҭамыр Логәуа Очамчыреи Тҟәарчали араионқәа рахь аусуратә ныҟәара мҩаԥигеит. Дырҭааит еиҳа еицырдыруа аҭыԥқәа – аӡырԥхақәа, апансионат "Аевкалиптра", асасааирҭақәа "Тамшь Village", "Амшынеиқәатәи абырлаш", Отаптәи аҳаԥы, "Мрагыларатәи апарк", Тҟәарчалтәи арадонтә ӡыхьқәа.
Логәуа инаҵшьны иазгәеиҭеит, ақалақь аилаҩынтра аҟынтәи аԥсшьаразы Аԥсныҟа иаауа ауаа рхыԥхьаӡара еиҳа-еиҳа ишырацәоу, иара убасгьы мрагыларатәи араионқәа рҿы аекологиатәи ақыҭанхамҩатәи атуризм аҿиара шалшо.
"Атуризм аминистрра Аԥсны мрагыларатәи аган атуризм аҿиара адгылара аҭара иазхиоуп. Ҳара Урыстәылеи адунеи акәакьқәа зегьы рҟынтәи атуристцәа радыԥхьалара азы аус ҳуеит", — ҳәа азгәеиҭеит иара.