АҞӘА, лаҵара 26 - Sputnik. Аԥсны зҽаԥсазтәыз аҟазара аусзуҩ, акомпозитор, амузыкаҭҵааҩ Алықьса Чычба диижьҭеи 100 шықәса аҵра инамаданы ибиуст аадыртит Аҟәатәи амузыкатә ҵараиурҭаҿы. Ашкол адиректор Нинель Бжьаниаԥҳа иазгәалҭеит Чычба директорс даныҟаз аамҭа Аԥсны амузыкатә культура ашәҭымҭа ишҭагылаз.
"Сара исҭахуп урҭ ашықәсқәа раан иҟаз аԥҟарақәа, аизҳара иахьагьы иҳамазарц", — лҳәеит лара. Абиуст авторс дамоуп аԥсуа скульптор қәыԥш Ҭемыр Аҳәба.
Иара убас Аҟәатәи аҳәынҭқарратә музыкатә ҵараиурҭаҿы Алықьса Чычба диижьҭеи 100 шықәса аҵра иазкны аконференциа мҩаԥысит. Аусмҩаԥгатә аҿы акомпозитор имузыкала иаԥҵоу арҿиамҭақәа нарыгӡеит, ажәахәқәа ирыԥхьеит.
Иқәгылоз еиҭарҳәеит Чычба ирҵаҩратәи ирҿиаратәи усура Аԥснытәи амузыкатә школ аҿиараҿы иамоу аҵакы. Аконференциа еиднакылеит Алықьса Чычба иҭынха еиҵагыло абиԥарақәа рзы иамоу аҵакы азгәазҭаз иналукааша аекспертцәеи аҭҵааҩцәеи.
Алықьса Чычба диит лаҵара 25 1925 шықәсазы. Иара 50 ашәа инареиҳаны дравторуп, урҭ рахь иаҵанакуеит Баграт Шьынқәба иажәеинраалақәа рыла иаԥҵоу "Кәафҭа шкәакәа", "Иҟалазеи". Аԥсны Аџьынџьтәылатә еибашьра 1992–1993 шықәсқәа раан ихортә ашәа "Аԥсны аҵеицәа" аибашьцәа ргәы шьҭнахуан.
Чычба аԥсуа ҟазаратә музыка ашьапы икит, иаԥиҵеит Аҳәынҭқарратә симфониатә аоркестр, ахортә капелла, иара убас жәлар рашәаҳәареи рыкәашареи рансамбльқәа. Иара ибзоурала иаԥҵан Аԥсны Акомпозиторцәа реидгыла. Алықьса Чычба иԥсҭазаара далҵит 1996 шықәсазы. Ихьӡ ахуп Аҟәатәи амузыкатә ҵараиурҭа.