АҞӘА, лаҵара 27 - Sputnik. Аԥсны ахада Бадра Гәынба Венесуела ахада Николас Мадуро ипартиа апарламенттә алхрақәа рҿы аиааира ахьагаз идиныҳәалеит.
Иара иажәақәа рыла, ари аиааира Венесуела ауааԥсыра рҟынтәи агәрагара ду шыҟоу аанарԥшуеит.
"Аԥсны ахьыԥшымра азхаҵара азҵаараҿы иаашәырԥшуа апозициа ҕәҕәа ахә ҳаракны иаҳшьоит, жәларбжьаратәи аренаҿы иааиԥмырҟьаӡакәа иҟашәҵо адгыларазы иҭабуп ҳәа шәаҳҳәоит", – ҳәа азгәеиҭеит Гәынба.
Аԥсны ахада аҩтәылак рыбжьара аполитикатә диалог арҵаулареи ахәаахәҭратә, аекономикатә, акультуратә еимадарақәа рырҭбаареи ирызку аусеицура ҟалап ҳәа агәыӷра шимоу азгәеиҭеит.