АҞӘА, лаҵара 27 - Sputnik.Кавказтәи аинвестициатә форум аҿы иӡыргоу аԥсуа стенд даҭааит Урыстәыла аиҳабыра рхада Михаил Мишустин.
Иара диԥылеит Аԥсны ахада Бадра Гәынба. Гәынба Мишустин Аҟәатәи аҳаирбаӷәаза аиҭашьақәыргыларатә проект иирбеит.
"Аԥсны аекономика аҿиара бзиа амоуп, Урыстәыла аиҳабыреи ҳареи ҳаизыҟазаашьақәа рыбзоурала", — азгәеиҭеит Гәынба.
Бадра Гәынба напхгара зиҭо Аԥснытәи аделегациа Кавказтәи аинвестициатә форум иалахәуп. Ареспублика Аԥснытәи ааглыхыҩцәа раалыҵқәа зныԥшуа астенди Аҟәатәи аҳаирбаӷәаза аиҭашьақәыргыларазы аинвестициатә проекти ӡыргоуп.
Иацы, астенд иаҭааит Урыстәыла аԥыза-министр ихаҭыԥуаҩ Александр Новаки Нхыҵ-Кавказтәи Афедералтә округ аҿы Урыстәылатәи Афедерациа ахада азинмч нагӡа змоу ихаҭарнак Иури Чаикеи.