АҞӘА, лаҵара 28 - Sputnik. Урыстәыла атранспорт аминистр актәи ихаҭыԥуаҩ Валентин Иванов агәаҭара-аушьҭратә ҭыԥ "Адлер" аҿы аҽазыҟаҵаратә усурақәа рымҩаԥысшьа гәеиҭеит.
Агәаҭара-аушьҭырҭатә ҭыԥ аиҭашьақәыргылара мҩаԥысуеит амилаҭтә проект "Хра змоу атранспорттә система" аҳәаақәа ирҭагӡаны. 2027 шықәсазы амҩатә цәаҳәақәа 28 ҟалоит, азнеишьа ҿыц алагалара иабзоураны, 8-цәаҳәак рҿы аамҭак ала 80 машьына ргәаҭара алыршахоит ҳәа аанацҳауеит "Росгранстрои".
Аушьҭырҭа-гәаҭаратә ҭыԥ аҿы есыҽны иныҟәо амашьынақәа рхыҧхьаӡара 14 нызқь рҟынӡа аизҳара азԥхьагәаҭоуп, аныҟәаҩцәа рхыԥхьаӡара хынтә еизҳараны иҟоуп.
"Адлер" Урыстәыла аҳәааҿы зегь реиҳа апассаџьырцәа реиԥш атранспортгьы ахьырацәоу ҭыԥуп. 2024 шықәсазы ҽнак ала 12 нызқь машьынеи 70 нызқь ауааи иреиҳаны ианымҩасуаз ыҟан.