АҞӘА, рашәара 3 - Sputnik. Иҳаҩсыз ашықәс иалагӡаны Аԥсни Санкт-Петербурги рыбжьара ахәаахәҭратә еиҭныԥсахлара ҩынтәны еизҳаит, уи 15,5 миллион доллар артәеит.
Абри атәы рҳәеит иахьа Санкт-Петербург агубернатор Александр Беглови, Урыстәылеи БРИКС атәылақәеи рҟны Аԥсны ахада ихаҭарнак ҷыда Лаша Сақаниеи, ҳаҭыр зқәу аконсул Владимир Бигәааи реиԥылараҿы.
2024 шықәсазы Санкт-Петербургнтәи Аԥсныҟа иааган аоптикатә, ашәагатә, амедицинатә хархәагақәа, иара убас амашьынаргыларатә аалыҵқәа. Ареспублика анҭыҵ еиҳарак иршьҭуаз ашәыр, араса, амшынаалыҵқәа роуп.