АҞӘА, рашәара 14 - Sputnik. Аҟәа аԥышәаратә режим ала атуристтә милициа аусура иалагоит ҳәа арадио Sputnik аефир аҿы еиҭеиҳәеит Аԥсны аҩнуҵҟатәи аусқәа рминистр ихаҭыԥуаҩ Беслан Ҷкадуа.
Аусбарҭаҿы макьана иҷыдоу аҟәша ыҟаӡам, ари аусура иадрыԥхьалоит акурсантцәа, амилициа ашкол аушьҭымҭацәа, егьырҭ аусзуҩцәа – иааидкыланы 25-ҩык ауаа ҳәа азгәеиҭеит Ҷкадуа.
Дара иҷыдоу аформа ршәызаауеит – "Атуристтә милициа" ҳәа аҩыра зну акьаҿ шкәакәақәеи абеисболкақәеи.
"Урҭ хықәкы хадас ироуеит ауаажәларратә ҭынчра ахьчара, ирыдҵоу аҵакыра ахылаԥшра, урҭ ирыдҵаало атуристцәа аинформациатә цхыраара рыҭара", — ҳәа иҳәеит аминистр ихаҭыԥуаҩ.
Аԥышәаратә проект алҵшәа аиур, иҷыдоу аҟәша аԥҵахоит.
Беслан Ҷкадуа иҿцәажәара шеибгоу шәахәаԥшыр шәылшоит Sputnik Аԥсны ВКонтакте адаҟьаҿы.