АҞӘА, рашәара 21 - Sputnik. Аҟәа аԥышәаратә режим ала атуристтә милициа аусура иалагеит. Абри атәы аанацҳауеит аусбарҭа апресс-маҵзура.
Аԥсны аԥыза-министр ихаҭыԥуаҩ, аҩнуҵҟатәи аусқәа рминистр Роберт Кьиут АҩАР аҟәша ҿыц агәаҭара мҩаԥигеит.
"Аԥсны иаҭаауа атуристцәа рхыԥхьаӡара есышықәса еизҳауеит, уи аҟынтә ас еиԥш иҟоу иҷыдоу аҟәша ыҟазароуп. Ҳара иҳаӡбеит Амилициа ашкол аҟны еиҿаҳкаарц атуристтә милициа агәыԥ, дара акурорттә аамҭазы рнапынҵақәа нарыгӡалоит. Аҟәа ауп иахьеиҿкаау, избан акәзар, макьана аԥышәагәаҭара иахыгатәуп", — иҳәеит Кьиут.
Апроект ахықәкы хада — ауаажәларратә ҭынчра ахьчара, ирыдҵоу аҵакыра ахылаԥшра, урҭ ирыдҵаало атуристцәа аинформациатә цхыраара рыҭара.
Аусура иадрыԥхьалеит акурсантцәа, Амилициа ашкол аушьҭымҭацәа, егьырҭ аусзуҩцәа — иааидкыланы 25-ҩык. Дара иҷыдоу аформа ршәызаауеит – "Атуристтә милициа" ҳәа аҩыра зну акьаҿ шкәакәақәеи абеисболкақәеи.