АҞӘА, рашәара 21 - Sputnik. Аџьаԥҳаны аҵәахырҭа ду рыԥшааит Аԥсны Ашәарҭадаратә маҵзура аусзуҩцәа Гәылрыԥшь араион Азанҭа ақыҭан ҳәа аанацҳауеит аусбарҭа апресс-маҵзура.
743 ак аџьаԥҳаны, урҭ рхыԥхьаӡараҿы иҟан ашәарҭара ду зцу артиллериатә ԥҽыхацырҟьа-ахыртҟәацтә рҭҟәацгақәа рылган Аԥсны АҶ аминистрра аусзуҩцәа рыцхыраарала.
Ахыршәқәа зегьы ирҭаз артҟәацгақәа х-кьылак иреиҳан. Иааидкыланы артҟәацгатә маҭәашьарқәа — 2,5 тонна ыҟан.
Аспециалистцәа иҟарҵаз алкаа инақәыршәаны аџьаԥҳаны зегьы ахархәа ҟалоит.
Аԥсны Ашәарҭадаратә маҵзура анапхгара рыӡбарала иԥшааз аџьаԥҳаны Аԥсны атәылахьчара иаҭан.
Аҵәахырҭа ахьыԥшааз аҭыԥ уахгьы-ҽынгьы иахылаԥшуеит. Аԥсны АшәМ аусзуҩцәа аџьаԥҳаны аҵәахырҭа шеиҿкааз аилкааразы аусҭҵаарақәа мҩаԥыргоит.