АҞӘА, ԥхынгәы 6 - Sputnik. Рашәарамзазы афымцадәыӷба "Диоскуриа" 25 нызқьҩык инареиҳаны апассаџьырцәа мҩаннагеит ҳәа арадио Sputnik аефир аҿы иҳәеит Аԥснытәи аихамҩақәа ранџьныр хада Леонид Ҟәыруа.
Иара иажәақәа рыла, есымза апассаџьырцәа рхыԥхьаӡара еизҳауеит.
"Афымцадәыӷба даара иманшәалоуп. Сгәанала, авокзалақәа рхаҿра аиҭашьақәыргылараз имҩаԥааго аусурақәагьы ареспубликахь иаауа апассаџьырцәа рхыԥхьаӡара аизҳара иацхраауеит", — ҳәа иҳәеит Ҟәыруа.
Адәыӷба "Диоскуриа" рашәара 1 азы аусура иалагеит. Иара есыҽны Аҟәеи Сириуси рыбжьара ҩынтә ибжьысуеит.