АҞӘА, ԥхынгәы 7 - Sputnik. Фазиль Искандер имҩаҿы акаҭран ашьҭаҵара иалагеит ҳәа аанацҳауеит Аҟәа ахадара апресс-маҵзура.
Иҷыдоу амаҵзурақәа 320 метра зоура ыҟоу амҩа актәи ахҟьа шьҭарҵеит.
"Ауааԥсыра аҳәарақәа рацәаны иҟарҵахьан. Ақалақь ахада Ҭемыр Агрба ажәа риҭеит иаарласӡаны аусурақәа шынагӡахо азы", — ҳәа иҳәеит Аҟәа ахада ихаҭыԥуаҩ Константин Ҭарба.
Ҭарба иажәақәа рыла, аусурақәа жәамш ирылагӡаны ихыркәшахарц азԥхьагәаҭоуп, анаҩс ашьаҟауаа рымҩа шьҭарҵоит, алашарбагатә шьаҟақәа рыԥсахуеит, аҵлақәа еиҭарҳауеит. Аҳҭнықалақь абиуџьет аҟынтәи ари амҩа ашьҭаҵаразы 16 миллион мааҭ инареиҳаны иазоужьуп.