Ҭемыр Агрба еиҭеиҳәеит Аҟәа ақалақь аҩнуҵҟа ицо арҽеиратә усурақәа ртәы
© Foto / Пресс-служба президента Абхазии
Анапаҵаҩра
АҞӘА, рашәара 17 - Sputnik. Бадра Гәынба ақалақьқәеи араионқәеи рхадацәа алархәны имҩаԥигаз аилацәажәараҟны Аҟәа ахада Ҭемыр Агрба ақалақь аҩнуҵҟа ицо арҽеиратә усурақәа ртәы изеиҭеиҳәеит.
Аԥшацәгьа иахҟьаны аԥхасҭа зауз аҩнеихагылаҿы аремонт хыркәшоуп. Ажәанба имҩаду аҿы игылоу аҩны аанханы иҟоуп, уи апроект аҭҵаара иаҿуп.
Ажәанба имҩаҿы аӡымҩангагақәеи ацрыҵцарҭақәеи ԥсахуп, Лакоба имҩа инаркны Амҳаџьырқәа рыԥшаҳәа аҟынӡа аколлектор аԥсахреи акаҭран ақәҵареи азгәаҭоуп.
Амҩақәеи, аангыларҭақәеи, асветофорқәеи рырҽеиразы аусурақәа цоит, анхарҭатә гәарақәа реиҿкаара иаҿуп, аӷәраҵақәа рҭырбаразы амаҭәахәқәа раахәаразы иҿарҵеит.
Акурорттә аамҭазы агәамсам ақәгыразы аконтенеирқәа аахәоуп.
Иара убас аԥсуа архитекторцәеи урыстәылатәи рколлегацәеи дареи Диоскураа рыԥшаҳәа аиҭашьақәыргыларазы апроект аус адырулоит ҳәа иҳәеит Агрба. Аинформациатә стендқәа Ақалақь амш — ԥхынгәы 5 рзы иқәыргылахоит.
Ҭагалан излагараны иҟоу аиҭашьақәыргыларатә усурақәа зегьы иааиуа аԥхынтәи аамҭазы ихыркәшатәуп ҳәа азгәеиҭеит Гәынба.
