АҞӘА, ԥхынгәы 16 — Sputnik. Аҳәса ркомандақәа рыбжьара амҵәышәымпыл азы жәларбжьаратәи атурнир "Кавказ ажәларқәа реиҩызара ахраҿа" аатит Аҟәа ақалақь аҿы.
"Ари жәларбжьаратәи ҳтурнир — аҵакы ҵаулоуп, ҳара даара иаҳҭахуп еиҳа ирацәаны акомандақәа ааларц. Даараӡа иҭабуп ҳәа раҳҳәоит иалахәу зегьы, ахәмарра бзиақәа ҳшәырба!", — абас иҳәеит аԥыза-министр ихаҭыԥуаҩ, аспорт азы аҳәынҭқарратә еилакы аиҳабы и.н.Ҭарашь Ҳагба.
Аицлабрақәа ԥхынгәымза 20 рҟынӡа имҩаԥыслоит. Урҭ рхы рыладырхәуеит Аԥсни, Ҟарачы-Черқьессиеи, Краснодартәи атәылаҿацәи рҟынтәи акомандақәа.