АҞӘА, ԥхынгәы 17 — Sputnik. Аԥсныҟа ԥсшьара ҳәа иааит Курсктәи аобласт аҟынтәи ахәыҷқәеи урҭ рҭаацәеи.
Украинатәи Арбџьармчқәа рҟынтәи арегионқәа ааха ду роуит, асасцәа аӡәырҩы рыуацәа рцәыӡит, рыҩнқәагьы еилаԥырыххааит. Дара рзы Аԥсынтәыла аԥсшьара — ԥсеиқәырхагоуп, аамҭала акәзаргьы рыԥсҭазаара иацу агәҭынчымра маҷк ирханаршҭоит.
"Аибашьра атема даара иаҳзааигәоуп аҟынтә ҳара еснагь ҳазхиоуп — ҳҩызцәеи ҳадгылаҩцәеи рыдгылара. Ахәыҷқәа ирҳәоит акыр мзы рыҩнуҵҟа раԥхьаӡакәны ашәарҭадара аҟазаара шырнырыз. Даара ҳақәгәыӷуеит арантәи агәахәаратә цәаныррақәа рыманы ицап ҳәа", — иҳәеит Аԥсны атуризм аминистр Асҭамыр Логәуа.
Курсктәии Белгородтәии аобластқәа рҟынтәи 200-ҩык ахәыҷқәа Аԥсны рыԥсшьара ареспублика ахада Бадра Гәынба инапынҵалаа еиҿкаан. Гәыԥҩыкк рыԥсы ршьоит — Аҟәа, даҽа гәыԥк — Пицунда.