АҞӘА, ԥхынгәы 18 — Sputnik. Аԥснытәи аҳәынҭқарратә университет аҿы имҩаԥысит аректор Алеко Гәарамиеи Адунеизегьтәи аҿар рфестиваль адирекциа адиректор Дмитри Иванови реиԥылара.
Аиԥылараҿы Гәарамиа игәалаиршәеит иара ихаҭа ҩ-фестивальк – Москвеи Берлини дышрылахәыз.
Иара убасгьы иазгәеиҭеит, раԥхьаӡатәи аҿартә еиҿкаара ААУ Астудентцәа реидгыла ауниверситет аҟны ишаԥҵаз.
Иалацәажәеит аԥсуа студентцәа иреиҳау аҵараиурҭақәа ианрылгалак ашьҭахь усурҭала реиқәыршәараҿы ауадаҩрақәа шыҟоу.
Иванов иажәақәа рыла, астудентцәа рыԥсадгьыл ахь рыхынҳәразы Аԥсны аинфраструктура аԥҵаразы Урыстәыла ашьаҿақәа ҟанаҵоит.
Иара инаҵшьны иазгәеиҭеит, иаарласны Урыстәыла атәылауаҩра змам Аԥсны атәылауаа еиуеиԥшым апроектқәа рынагӡаразы агрантқәа роурц арзаҳалқәа ралаҵара шрылшо. Уи азы апроект Урыстәыла аиҳабыра ишырзынашьҭу.
Иара убас, Адунеизегьтәи аҿар рфестиваль адирекциа адиректор иҳәеит сынтәа ААУ астудентцәа назлоу 40-ҩык Аԥсны ахаҭарнакцәа афестиваль рхы шаладырхәуа. Зынӡа 2000-ҩык алахәылацәа азгәаҭоуп. Афестиваль цәыббрамзазы Нижни Новгород имҩаԥысраны иҟоуп.