АҞӘА, ԥхынгәы 22 — Sputnik. Уаҵәы Пицунда иаатуеит актәи Жәларбжьаратәи агастрофестиваль. Абри атәы арадио Sputnikаефир аҟны иҳәеит аиҿкааҩцәа руаӡәк, аицлабра "Аԥсны акоманда" аҿы аиааира згаз Демид Ҳагба.
Иааидкыланы 45-ҩык алахәхоит, урҭ рҟнытә 10-ҩык инареиҳаны Краснодартәи атәылаҿацә аҟынтәи иаауеит.
Ҳагба иазгәеиҭеит, афестиваль асасцәа иаархәыр шрылшо анаплакҩцәа раалыҵ, иара убас хәыда-ԥсада аусмҩаԥгатәқәа рхы алархәра – аиҿкааҩцәа иазгәаҭан ирымоуп атематикатә хәылԥазқәа, аконцерт, аниматорцәа рықәгылара, асалиут.
Агастрофестиваль мҩаԥысуеит Пицунда Ақалақь амш инақәыршәан ԥхынгәы 25 рзы.