АҞӘА, ԥхынгәы 24 — Sputnik. Аԥсны мрагыларатәи ахәҭаҿы атуристтә маршрут ҿыц аԥҵахоит.
Аԥсны атуризм аминистр Асҭамыр Логәуа Отаԥтәи аҳаԥы даҭааит. Иара убас, Логәуа ақыҭақәа Араду, Мықә, Ҷлоу ирылсны инеиуа амҩақәа гәеиҭеит, иара игәҭакы — Арасаӡыхьи Гәыԥи ирылсны ԥшь-километрак инаӡоу амҩа ҿыц аргылара далацәажәеит. Логәуа ари иажәалагала ареспублика ахада иахь инаишьҭуеит.
Ари амҩахәҭа Тҟәарчали аҳаԥи еиднакылоит ҳәа азгәаҭоуп, амҩа ҿыц — “мрагыларатәи атуристтә мацәаз" ҳәа изышьҭоу амаршрут иахәҭакхар ҟалоит.
Апроект Аԥсны мрагыларатәи араионқәа рҿы иҟоу аҭыԥԥшӡарақәа рахь рнеира армариареи, аинвестициақәа радыԥхьалареи, аҭыԥантәи аекономика аҿиареи ирызкуп ҳәа аанацҳауеит атуризм аминистрра.