АҞӘА, ԥхынгәы 24 — Sputnik. Гәылрыԥшь араион аҿы 2025 ашықәсбжазы афымцамч ахархәаразы аԥарақәа реизгара иҳаҩсыз ашықәс иара абри аамҭахәҭа иаҿырԥшны ҩынтәны еиҳахеит.
"Афымцаҭира" афилиал аиҳабы Асҭамыр Џьынџьал иажәақәа рыла, иааизакны еизгатәны иҟаз рҟынтәи 42,6% аԥара еизгоуп, иҳаҩсыз ашықәс азы уи 25% иреиҳамызт.
"Ахатәхаҿқәеи аиуристхаҿқәеи рҟынтә ашәарақәа рдинамика 17,7% иҟоуп. Ахатәхаҿқәа 2025 шықәса аԥхьатәи абжазтә ршәарақәа рыпроцент 27,9% иҟан, уи 2024 шықәса иара абри аамҭазтәи ашәарақәа раасҭа ҩынтә еиҳауп", — иҳәеит иара.
Џьынџьал иҳәеит араион аҿы 9117- ҩык абонентцәа шыҟоу, аԥара ылзго 7-ҩык роуп ыҟоу ҳәа.
Ашықәс актәи азбжа аихшьаалақәа рыла, араион ауал 61,9 миллион мааҭ ыҟоуп, урҭ рҟынтә 61,6 миллион ахатәхаҿқәа роуп изқәу.