АҞӘА, ԥхынгәы 25 — Sputnik. Аԥсны аԥыза-министр ихаҭыԥуаҩ, аҩнуҵҟатәи аусқәа рминистр Роберт Кьиут Волгоград ақалақь аҿы имҩаԥысуаз Урыстәыла аҩнуҵҟатәи аусқәа рминистрра Академиа аԥснытәи аушьҭымҭацәа адипломқәа ранашьара далахәын.
Сынтәа аҵараиурҭа иалгеит ааҩык, урҭ рахьтә ҩыџьа — криминалистцәоуп, егьырҭ "Аҩнуҵҟатәи аусқәа заанаҵтәи аҭҵаара" азанааҭ ала рҵара хдыркәшеит ҳәа аанацҳауеит аусбарҭа апресс-маҵзураҩ.
Кьиут аушьҭымҭацәа адипломқәеи агәышԥтәы дыргақәеи ранеишьеит. иара иазгәеиҭеит азинхьчаратә усбарҭақәа русзуҩцәа ҿарацәа аҭакԥхықәра ду шрыду, урҭ рзанааҭтә еизҳара аҿы аминистрра анапхгара ацхыраара шыҟарҵо.