АҞӘА, ԥхынгәы 29 - Sputnik. Бадра Гәынба даҭааит жәлар рнапҟазарҭатә студиа "Артель" ҳәа аанацҳауеит атәыла ахада ипресс-маҵзура.
"Ас еиԥш иҟоу ааглыхра адгылара аҭатәуп. Жәаҳәарада, ари зегь раԥхьаӡа иргыланы — аусурҭа ҭыԥқәа, ашәахтәқәҵаратә база ҿыц ауп. Иара убас, акырӡа аҵанакуеит иҳамоу алшарақәа – жәлар рҟазара, атрадициақәа рыхьчара", — ҳәа азгәеиҭеит аҳәынҭқарра ахада.
Астудиа Аҟәатәи аҳәынҭҵараиурҭеи ААУ-и аусеицуразы аиқәшаҳаҭра рыбжьарҵахьеит. Уи анаԥхгаҩы Даур Гәымба иажәақәа рыла, иҟоуп алшара астудентцәа "Артель" аҟны ааглыхратә практика иахысыртә еиԥш.
Аиԥылара аихшьаалақәа рыла, аҳәынҭқарра ахада ажәа риҭеит ахыбрақәа рызҵаара аӡбараҿы ацхыраара шыҟаиҵо, анаплакҩцәа рыцхыраара апрограмма ала аԥара азоужьра, иара убас аԥшшәы змоу аметаллқәа аус рыдуларазы аусурҭа аԥҵаразы ацхыраара шыҟаиҵо ҳәа аанацҳауеит аҳәынҭқарра ахада ипресс-маҵзура.