АҞӘА, нанҳәа 11 - Sputnik. Аԥсни Псковтәи аобласти рыбжьара аҳаиреимадара абжьаҵара иалацәажәеит аԥыза-министр Владимир Делбеи аобласт агубернатор Михаил Ведерникови.
"Ҳара даара ҳақәгәыӷуеит ари апроект анагӡара, Псковтәи аобласт аганахь алагьы. Сара даҽазныкгьы ишьақәсырӷәӷәоит аиҩызаратә еизыҟазаашьақәа ҳашрыдгыло", — ҳәа азгәеиҭеит Делба.
Аминистрцәа реилазаара аиҳабы иҳәеит аганқәа аекономикатә, асоциалтә, акультуратә усхкқәа рҿы аҩганктәи русеицураҿ ихадоу ахырхарҭақәа ишрылацәажәаз, нанҳәа 25 рҟынӡа еицырзеиԥшу аусмҩаԥгатәқәа рыплан аус адуларазы ишеиқәшаҳаҭхаз.
Ведерников иҳәеит, цәыббрамза 1 азы аганқәа еицырзеиԥшу аусмҩаԥгатәқәа рыплан шьақәырӷәӷәаны анагӡара ишалаго.
"Ауснагӡатә шьақәырӷәӷәахаанӡа Аҵареи Аҿар рполитикази аминистррақәа аусура иалагоит. Убри аҟнытә ҳара агәыӷра дуқәа ҳамоуп", — ҳәа иҳәеит иара.