АҞӘА, нанҳәа 21 - Sputnik. Ақәаршҩы ӷәӷәеи аԥшеи Гагра аинфраструктура аԥхасҭа арҭеит, абри атәы Sputnik иазеиҭеиҳәеит араион ахада актәи ихаҭыԥуаҩ Адамыр Цәышба.
Цәышба иажәақәа рыла, хатәыҩнқәаки ауадарацәа змоу ҩынқәаки рхыбқәа хнашәеит.
Аҵлақәагьы каҳаит. Афымцацәаҳәақәа ԥыҵәҵәеит, аканализациатә ӡыҭгагастанциа аамҭала аусура иаҟәыҵит, уи иахҟьаны амҩақәа жәпакы ӡыла иҭәит.
"Амҩадуи аихамҩеи рҿы аныҟәара еиҭашьақәыргылоуп, амҩақәа ррыцқьара иаҿуп", — иҳәеит Цәышба.
Гагра араион амцарцәара- аиқәырхаратә усбарҭа излаанацҳауа ала, аӡәгьы ԥырхага рмоуит.