АҞӘА, цәыббра 6 — Sputnik. Аԥсны алахәын Аладатәи Новгород имҩаԥысуаз аинклузивтә форум "Аритм аҵакырадгьыл".
"Ҳара ҳзы ари хәы змам ԥышәоуп. Ҳара иаҳбеит аларҵәара змоу ҳпрограммақәа рҿы ҳхы иаҳархәар ҳалшо аинклиузивтә практикақәеи иԥхьагылоу аметодикақәеи рынагӡараҿы ақәҿиара змаз аҿырԥштәқәа", — ҳәа азгәалҭеит алахәылацәа руаӡәк, агәыҳалалратә центр "Ҳара ҳаицуп" адиректор Милана Аџьԥҳа.
Лара лажәақәа рыла, афорум ареабилитациатә центрқәеи егьырҭ аиҿкаарақәеи русеицура азы ҭыԥны иҟалеит, иара убасгьы амаҵзурақәа рымҽхак арҭбаареи урҭ рхаҭабзиара аизырҳареи рзы ацхыраара ҟазҵо аматериалқәа рыла еиқәыршәан.
Иазгәалҭеит, зылшарақәа еиҟароу ауаажәларра раԥҵара зҽазызшәо рзы аинклиузиа иахьагьы актуалра злоу теманы ишыҟоу Аԥсны азы.
Иара убас, аусмҩаԥгатә аҿы Аинклиузивтә туризм ассоциациа апрезидент, апроект "Аԥсны акоманда" афиналист Руслана Гьергьедааԥҳа ицәырылгеит апроект "Иузыманшәалоу Аԥсынтәыла".