АҞӘА, цәыббра 7 — Sputnik. Ешба имҩаду аҿы амҩатә шәарҭадара аԥҵаразы Аҳәынҭқарратә инспекциеи Ареспубликатә хәшәтәырҭеи рахь уназго амҩа хәҭаҿы ахԥатәи амҩатә цәаҳәа аартхоит ҳәа арадио Sputnik аефир аҿы иҳәеит Аҟәа ақалақь ахада ихаҭыԥуаҩ Константин Ҭарба.
Иара иажәақәа рыла, ари амҩа хәҭаҿы лассы-лассы амашьынақәа еиԥынгылоит. Уи зыхҟьо мзызс хадас иҟоу амҩа ганк иангылоу амашьынақәа роуп, уи амҩаду аҿы аныҟәара аруадаҩуеит.
Амҩа арҭбаара, насгьы Аҳәынҭавтоинспекциеи ахәшәтәырҭеи рахь ицо рзы иацҵаны амҩа аартра акырӡа ицхыраагӡахоит. Уи адагьы, анаԥхгара ргәы иҭоуп аангыларҭақәа реиқәыршәара.