АҞӘА, цәыббра 8 — Sputnik. Аԥсуа культура V афестиваль "Аԥсны" мҩаԥгахоит москватәи абаҳча "Ермитаж" аҿы цәыббрамза 21 рзы.
Афестиваль иахықәкы хаданы иҟоуп — асасцәа итрадициатәу аԥсуа культуреи Аԥсны аҭоурыхи дырдырра, иара убасгьы иахьатәи аамҭазы атәыла аҿиара аарԥшра.
Ауснагӡатә алагоит асааҭ 12:00 рзы, имҩаԥыслоит — хәылбыҽханӡа. Апрограмма шьақәгылоуп амилаҭтә аишәачара архиарала, алекциақәа, аџьармыкьа, атурнирқәа, аҟаза-иклассқәа рыла. Асцена иқәгылоит аԥсуа естрада артистцәа, Оҭар Хәынҵариа ихьӡ зху жәлар ринструментқәа рҳәынҭқарратә оркестр, иара убас РУСДРАМ артистцәа аспектакль "Аҵыҵындра" ддырбоит.
Уи адагьы, афестиваль аҿы имҩаԥгахоит хәыда-ԥсада Аԥсны аԥсшьараз 20 путиовка рырхәмарра.
Аԥсуа культура афестиваль имҩаԥыргоит 2018 шықәса раахыс. Аиҿкааҩцәа — Москватәи аԥсуа диаспора.