АҞӘА, цәыббра 9 - Sputnik. Урыстәылеи Аԥсны адипломатиатә еизыҟазаашьақәа рыбжьаҵара астратегиатә еидгыларазы азинтә шьаҭа аԥнаҵеит ҳәа аҳәоит Аԥсны адәныҟатәи аусқәа рминистрра аҳәамҭа.
"Аԥсназы Урыстәылеи иареи адипломатиатә еизыҟазаашьақәа рыбжьаҵара ҷыдала аҵак ду амоуп. Ари аӡбара ҳҳәынҭқарра жәларбжьаратәи азхаҵаразы акыр зҵазкуа шьаҭаны, уи ашәарҭадаразы узықәгәыӷша хәдықәҵараны иҟалеит", — ҳәа аҳәоит атекст аҿы.
Аусбарҭаҿы инаҵшьны иазгәарҭеит 17 шықәса ирылагӡаны Аԥсни Урыстәылеи аиқәшаҳаҭра-зинтә шьаҭа шышьақәдыргылаз, еиуеиԥшым ахырхарҭақәа рыла аусеицура иҿыцу аҩаӡарахь ишкылыргаз, ԥхьаҟагьы аизыҟазаашьақәа шыӷәӷәахо азы агәыӷра шрымоу.
"Аԥсны асуверенитет аҿиареи арӷәӷәареи рҿы злагала дуу Урыстәыла иҟанаҵо адгылара ахә ҳаракны иаҳшьоит", — ҳәа аҳәоит атекст аҿы.