АҞӘА, цәыббра 10 - Sputnik. Аԥсны аҳәынҭқарра ахада иҿы иаԥҵоуп амилаҭбжьаратәи адинхаҵарабжьаратәи аизыҟазаашьақәа рзы ахеилак ҳәа аанацҳауеит атәыла ахада иусбарҭа апресс-маҵзура.
Абри азы аусԥҟа инапы аҵеиҩит аҳәынҭқарра ахада Бадра Гәынба.
Аҳәынҭқарра ахада хантәаҩыс дызмоу ахеилак аилазаараҿы иҟоуп аҳәынҭқарратә усбарҭақәа, адинтә еилазаарақәа, ақьырсиан, аԥсылман, аерман, абырзен, аурым милаҭтә уаԥшьқәа рхаҭарнакцәа, иара убас ауаажәларратә усзуҩцәеи аҳәынҭқарра ахада Иусбарҭа аусзуҩцәеи.