АҞӘА, цәыббра 12 - Sputnik. Аԥсны Аҳәынҭстандарт ашьҭаҵарҭаҿы 4300 инареиҳаны амаининг-аппаратқәа шьҭоуп ҳәа адырра ҟаиҵеит аԥыза-министр ихаҭыԥуаҩ Џьансыхә Нанба аенергетикатә шәарҭадара ашьақәыргыларазы ареспубликатә штаб аилатәараҿы.
Иара иазгәеиҭеит, Аҳәынҭстандарт адыррақәа рыла, ашықәс алагамҭа инаркны 259 аппарат шрылыргахьоу, 13 материал аӡбарҭахь ишырышьҭыз.
Убри аан, амаининг иаҿагыланы ақәԥара рнапы алакуп егьырҭ аусбарҭақәагьы ҳәа азгәеиҭеит Нанба. Ажьырныҳәамза инаркны Аҩнуҵҟатәи аусқәа рминистрра 456 "машьынка" ылыргахьеит, урҭ уажәы ирыхьчо ашьҭаҵарҭақәа рҿы иҵәахуп, урҭ нас Аҳәынҭстандарт ахь ииагахоит.