АҞӘА, цәыббра 14 - Sputnik. Оскар Гәазаа ихьӡ зху Гәдоуҭатәи №4 абжьаратә школ аҿы акапиталтә ремонт ашьҭахь аартра ииагоуп жьҭаарамза аҽеиҩшамҭахь, абри атәы Sputnik иазеиҭалҳәеит ашкол адиректор Манана Арӡынԥҳа.
Лара лажәақәа рыла, ашкол иаакәыршаны аанда ҿыц ықәыргылоуп, ашҭаҿы ахаҳәҟьаԥс шьҭаҵоуп, ахыбра аҽыԥшыларагьы аремонт азуп, аклассқәа хәба ауадақәеи, адиректор луадеи, арҵаҩцәа руадеи, аҩналарҭеи ауадабжьарақәеи рҟны арҽеиратә усурақәа хыркәшоуп. Аҩнымаҭәа аагоуп. Даҽа аклассқәа жәаба рҿы аремонттә усурақәа хыркәшатәуп.
"Амеценатцәа ражәа нарыгӡеит, ари аамҭахҵәазы ирҳәаз аусурақәа зегьы хдыркәшеит. Аҵара аминистрреи ҳареи ҳааилацәажәеит, иҳаӡбеит аусурақәа зегьы анхыркәшахалакгьы аҵаҩцәа ҳадаҳкыларц. Ахәыҷқәа рзы ус еиҳа иманшәалахоит", — лҳәеит лара.
Уи аԥхьа Аԥсны аҵара аминистрраҟны ирҳәахьан Гәдоуҭатәи аԥшьбатәи ашкол аҿы акапиталтә ремонт амҩаԥгара иахьаҿу иахҟьаны цәыббрамза 15 рзы иаатуеит ҳәа.
Аиҭашьақәыргыларатә усурақәа афинанстә цхыраара рырҭоит ари аҵараиурҭа зыхьӡ аху, Аԥсны Афырхаҵа Оскар Гәазаа иҭаацәа.