АҞӘА, цәыббра 14 - Sputnik. Пицунда аспорттә комплекс ҿыц аргыларазы аҵакыра арыцқьара иалагеит, абри атәы Sputnik иазеиҭеиҳәеит ақалақь ахада Рустам Агрба.
Ахыбра дыргылоит ақалақь ахадара ашьҭахь, ԥаса ақырҭуа школ ахьгылаз аҭыԥ аҿы. Аԥсны жәлар Рџьынџьтәылатә еибашьра ашьҭахь уи аусура иаҟәыҵит, ахыбра еилаҳаит, ашҭа хиааит.
Уажәазы аҵакыра аргыларатә усурақәа рымҩаԥгара азырхиара иаҿуп. Ахыбра ҩ-хәҭакны ишьақәгылоуп. Агрба иажәақәа рыла, урҭ руак еиҳа ибжьысхьеит, уи аиҭашьақәыргылара иаԥсоу-иаԥсаму аусдырцәа ахәшьара арҭоит.
"Аҭҵаара ашьҭахь ари ахәҭа иазаҳуа еилкаахоит — иқәгатәу ма иаанҳажьуа. Ахыбра иацҵаны аргыларақәа азгәаҭоуп, уаҟа иҟалоит аҽазыҟаҵаратә спортзали аӡҭарчи", — иҳәеит иара.
Ахыбра аргыларазы инықәырԥшшәа иаҭаххоит — 260-300 млн мааҭ, аԥара азоужьхоит — Гагра араион абиуџьет аҟынтәи. Иара убас Аԥсны ахада Бадра Гәынба иусуратә ныҟәарыла араион данаҭааз иҳәеит, аргыларазы афинанстә еицхыраара шыҟарҵо ареспубликатә биуџьет аҟынтәи.