АҞӘА, цәыббра 16 - Sputnik. ААУ-и НКАУ-и аусеицуразы аиқәшаҳаҭра ҿыц рыбжьарҵеит ҳәа аанацҳауеит Аԥснытәи ауниверситет.
Аганқәа еицырзеиԥшу аҵареи аҭҵаарадыррақәеи рпроектқәа ирылацәажәеит, урҭ рхыԥхьаӡараҿы иҟоуп археологиатә ҭҵаарақәа рзы Жәларбжьаратәи аҭҵаарадырратә-аҭцааратә лабораториа аԥҵара, астудентцәеи арҵаҩцәеи реимдара, аконференциақәеи аҵарадырра аизырҳаратә программақәеи рылахәхара.
"Нхыҵ-Кавказтәи Афедералтә университети Аԥснытәи аҳәынҭқарратә университети еиуеиԥшым ахырхарҭақәа рыла аусеицыруеижьҭеи акыр ҵуеит, агәра ганы сыҟоуп ҳаизыҟазаашьақәа рҿы иахьа даҟьа ҿыцк шааҳартуа. Ҳара аиқәшаҳаҭра ҳабжьаҳҵеит аҵаратә процесси аҭҵаарадырратә усура аиӷьтәреи рзы", — ҳәа лҳәеит НКАУ аректор инапынҵақәа назыгӡо Татиана Шабзыхә.
Аԥсны аҳәынҭқарратә университет аректор Алеко Гәарамиа ишазгәеиҭаз ала, иааит аамҭа ҿыц, ицәырҵит ахшыҩҵак ҿыцқәа, ирҿыцу аиқәшаҳаҭра иалнаршоит русеицура ахаҭабзиара еиӷьнатәуеит.
Аԥсны Аҵара аминистрреиНКАУ-и аусеицуразы аиқәшаҳаҭра рыбжьарҵеит цәыббра 16 рзы.