АҞӘА, цәыббра 16 - Sputnik. Аиааира амш азы Мықә ақыҭантәи амҩа еиҭашьақәыргылахоит.
"Аныҳәатә усмҩаԥгатәқәа азгәаҭоуп цәыббра 30 рзы. Ареспублика ауааԥсыреи асасцәеи ирзыманшәалахарц азы аныҳәа аиаанӡа аусқәа зегьы рхыркәшара ихадоу усуп. Ҳара ҳнапынҵа ианаамҭоу инаҳагӡоит", — ҳәа инаҵшьны иазгәеиҭеит Акапиталтә ргылара аусбарҭа анапхгаҩы Демир Гамсаниа.
Цәыббра 9 аҽны иҟаз амшцәгьақәа ирыхҟьаны ааха зауз ацҳагьы гәаҭан. Гамсаниа иажәақәа рыла, аҳәынҭқарра ахада ихаҭыԥуаҩ иаарласны ари апроблема ӡбахарц азы адҵа ҟаиҵеит.
"Ҳара уажәтәи аамҭазы атехникақәа рнагареи иахьшәарҭоу аҭыԥқәа рҟны абӷанҷ ақәԥсареи ҳаҿуп", — иҳәеит иара.
Цәыббра 27-28 рзы Мықәашҭаҿы аҽыбӷаҟазаратә еицлабрақәа мҩаԥысран иҟоуп, урҭ 1992-1993 шықәсқәа рзтәи Аԥсны жәлар Рџьынџьтәылатә еибашьраҿы игаз Аиааира азгәаҭара иазкхоит.