АҞӘА, цәыббра 29 - Sputnik. Аԥсны даҭааит Урыстәыла ахада Иусбарҭа аиҳабы актәи ихаҭыԥуаҩ Сергеи Кириенко ҳәа аанацҳауеит атәыла ахада ипресс-маҵзура.
Иара Аиааиреи Ахьыԥшымреи 32 шықәса ахыҵара иазку аныҳәатә усмҩаԥгатәқәа ихы рылаирхәуеит.
Атәыла ахада Бадра Гәынба дицны Кириенко даҭааит Аҟәа Кьалашәыртәи аихамҩатә аангыларҭа, игәеиҭеит абҵарамзазы аусура иалагараны иҟоу аспорттә проект "Аԥсуа ҳәаа" .
Уажәы Аӡҩыбжьа ақыҭан аҭыԥ архиара иаҿуп, иԥсабаратәуи иԥсабаратәыми аелементқәа еидызкыло аԥынгылақәа ркомплекс аԥҵаразы. Иара убас, апрограмма иагәылалоит акультуратә усмҩаԥгатәқәагьы.
Апроект Урыстәылеи ааигәатәи аҳәаанырцәтәи атәылақәеи рҟнытә аспортсменцәа радԥхьалареи асезонбжьаратә аамҭазы Аԥсны атуризм аҿиареи алнаршоит ҳәа азгәаҭоуп.
Апроект авторс дамоуп "Аԥсны акоманда" адиректор хада, аицлабра афиналист Георги Габуниа.