АҞӘА, жьҭаара 3 — Sputnik. Аҟәатәи амузыкатә ҵараиурҭа шьаҭанкыла аиҭашьақәыргыларазы аҽазыҟаҵаратә усурақәа хацыркхоит сынтәа.
Аиҭашьақәыргылара 2026 шықәсазы иалагоит ҳәа аанацҳауеит Урыстәыла акультура аминистрра.
Аҭуџьар Нинуа иҭоурыхтә ҩны ахаҿра ареставрациа мҩаԥгахоит, аҩычаратә елементқәа еиҭашьақәыргылахоит, ахыби аԥенџьырқәеи рыԥсахуеит, аҩнуҵҟатәи аиҿкаареи акоммуникациатә усқәеи дырҿыцуеит.
Уи адагьы, амузыкатә рҳәагақәа, аҩнымаҭәа, амаҭәахәқәа раахәара азгәаҭоуп.
Урыстәыла ахада Иусбарҭа анапхгаҩы актәи ихаҭыԥуаҩ Сергеи Кириенко уаанӡа адырра ҟаиҵахьан Урыстәыла акультура аминистрра Аҟәатәи амузыкатә ҵараиурҭа шьаҭанкыла аиҭашьақәыргыларазы ахарџьқәа ахахьы ишагаз.
Апроект анагӡара иааидкыланы 300 миллион мааҭ рҟынӡа ахәԥса наӡоит.