АҞӘА, жьҭаара 3 — Sputnik. Адәныҟатәи амчқәа рырцыхцыхра еизҳацыԥхьаӡа Аԥсни Аахыҵ Уаԥстәылеи Аладатәи Кавказ аҿы ирымоу аҵакы еиҳагьы ахә ҳаракны иршьоит ҳәа азгәеиҭеит аполитолог Беслан Камкьиа.
Иара инаҵшьны иазгәеиҭеит, ари арҭ арегионқәагьы зҵазкуа жәларбжьаратәи аибарххара жьҭаарамза 1 азы Аԥсни Урыстәылеи рыдәныҟаполитикатә усбарҭақәа рминистрцәа Олег Барцыци Сергеи Лаврови реиԥылара амзызқәа иреиуоуп ҳәа.
"Аахыҵ-Кавказгьы уахь иналаҵаны, Жәларбжьаратәи аибарххара арегионқәа зегьы ирныруеит. Ҳәарада, уаанӡа иазԥхьагәаҭаз азҵаарақәа Адәныҟатәи аусқәа рминистррақәа рылаԥш иаҵанакуеит", — иҳәеит аексперт.
Камкьиа иара убасгьы иҳәеит, аусеицуреи астратегиатә еиҩызареи рзы Аиқәшаҳаҭра шьаҭас иҟаҵаны аҩ-ҳәынҭқаррак реизыҟазаашьақәа аҿиара иаҿуп ҳәа.