АҞӘА, жьҭаара 10 - Sputnik. Александр Карелин Лыхны ақыҭан ахәыҷқәа рзы аҟазаратә-класс мҩаԥигеит ҳәа аанацҳауеит аҿари аспорти русқәа рзы Аҳәынҭеилакы.
Аусмҩаԥгатә мҩаԥысит ақыҭа ахадара ахыбраҿы цәыббрамза 28 рзы иаадыртыз зхы иақәиҭу аиқәԥаразы азал ҿыц аҿы. Еизнагеит Аԥсны зегьы аҟынтәи аспортсменцәа ҿарацәа жәпаҩык.
Карелин ақәԥара аҽазыҟаҵашьа амаӡақәа ртәы рзеиҭеиҳәеит, аспорт аҿы дызнысыз амҩа далацәажәеит, еиуеиԥшым ақәԥара атехникақәа дирбеит
Александр Карелин – абырзен-римтә стиль ала дықәԥаҩуп, хынтә Аолимпиатә хәмаррақәа рҿы аԥхьахәқәа ааникылахьеит (1988, 1992, 1996), жәынтәы адунеи ачемпионс дҟалахьеит, Гиннесс ирекордқәа рышәҟәаҿы 13 шықәса рыҩнуҵҟа иаҵамхац спортсменк иҳасаб ала дарбоуп.
Аҳәынҭқарратә Дума хә-аԥхьарак рҿы депутатс далхуп, 2020 шықәса аахыс Урыстәыла Афедералтә Хеилак далахәылоуп.