АҞӘА, жьҭаара 11 – Sputnik. Аԥсны ахада Бадра Гәынба арратә усзуҩцәеи аветеранцәеи Аԥсны Арбџьармчқәа аԥҵара амш рыдиныҳәалеит.
1992 шықәса жьҭаара 11 рзы Аԥсны Иреиҳаӡоу Асовет ахантәаҩы Владислав Арӡынба Атәылахьчара аминистрреи Аштаб хадеи раԥҵаразы Аусԥҟа инапы аҵеиҩит.
"Ари аҭоурыхтә шьаҿа — ар ашьақәгыларазы ашьаҭа шьҭнахит, уи ҳхьыԥшымра ахьчараҿы ихадоу ароль наныгӡеит. Ҳ-Арбџьармчқәа аибашьра адәаҿы рхеиҿкаара иалагеит, уи ала ргәымшәареи рыгәаӷьреи аадырԥшуан", — аҳәоит адныҳәалараҿы.
Гәынба иазгәеиҭеит, Аԥсны Арбџьармчқәа иахьатәи аамҭа иақәшәо аиӷьхара ишаҿу. Аруаа аматериал-техникатә цхыраара рыҭаразы аҳәынҭқарра иалшо зегьы ҟанаҵоит, иара убас Урыстәылеи Аԥсни арратә усеицура дырҭбаауеит.
Иара аруаа рҭаацәеи дареи агәабзиареи аманшәалареи рзеиӷьеишьеит, Аԥсны — аҭынчреи аизҳареи.