АҞӘА, жьҭаара 14 - Sputnik. Аҟәа Диоскураа рыԥшаҳәаҿы 50 инареиҳаны ахәаахәҭратә ҿхышәқәа ықәыргеит.
"Ҳԥшаҳәа аиҭашьақәыргылазы аҽазыҟаҵарақәа актәи ахәҭа мҩаԥысуеит. Уажәазы 55 инарзынаԥшуа ахәаахәҭратә ҿхышәқәа ықәыргахьеит, 40 раҟара аанхеит. Амза 20 рҟынӡа урҭгьы ықәыргоит", — иҳәеит ақалақь ахада ихаҭыԥуаҩ Константин Ҭарба.
Ҭагалан Диоскураа рыԥшаҳәа мҽхакы ҭбаала аиҭашьақәыргылара иалагоит. Ҭарба иҳәеит иаарласны уи азы Урыстәыла арегионқәа рҟынтәи аспециалистцәа шаауа.