АҞӘА, жьҭаара 21 – Sputnik. Аҟәатәи 1-тәи ашкол аҿы ашколхәыҷқәа рыбжьара аурыс бызшәеи алитературеи рзы Жәларбжьаратәи аолимпиада "Аурыс бызшәа акультурақәа реиҿцәажәаразы" аԥсуа хәҭа ахыркәшамҭа мҩаԥысит.
Аԥсни, Аахыҵ Уаԥстәылеи, Ермантәылеи рҟынтәи хнызқьҩык инареиҳаны ашколхәыҷқәа апроект рхы аладырхәит, урҭ рҟынтәи 90-ҩык афинал аҟынӡа инеит.
Урыстәыла аҵарадырра аминистр Сергеи Кравцов аилатәара иалахәыз онлаинла аԥсшәа реиҳәеит. Иазгәеиҭеит, астудентцәа аурыс бызшәахь ирымоу азҿлымҳара хдыррала иҟаҵоу алхреи, еицырзеиԥшу ԥхьаҟатәи аԥеиԥш азы акыр зҵазкуаш алагалоу. Иҳәеит аурыс бызшәа аҭоурыхи, алитературеи, акультуратә ҭынхақәеи еидызкыло, аиҿцәажәарақәа рзы зыԥсы ҭоу маруганы ишыҟоу.
Ашкол адиректор Нонна Делԥҳа иазгәалҭеит, ас еиԥш аусмҩаԥгатәқәа ажәларқәа рҭоурыхтә-культуратә еимадарақәа рырӷәӷәара ишацхраауа, аурыс бызшәа ахаҭа аринахысгьы аилибакааразы цҳаны ишыҟоу.
Армавиртәи аҳәынҭқарратә арҵаҩратә университет аректор Евгени Нижник иазгәеиҭеит, инеиԥынкыланы хышықәса раахыс имҩаԥысуа аолимпиада амҽхак аҽшрҭбаауа. Инаҵшьны иазгәеиҭеит, аурыс бызшәа хаҭалатәи аизҳареи адунеизегьтәи акоммуникациеи рзы маруганы ишыҟоу, алахәылацәа рықәҿиарақәа аурыс культура аҿиара ишацхраауа.
Аԥснытәи ашколқәа рҟынтәи иалахәыз рыбжьара актәи аҭыԥ аанылкылеитеит Галтәи 2-тәи ашкол аҵаҩы Хәарааԥҳа Лизи.
Иара убас аҳамҭақәа ирыԥсахеит:
Заприса Анастасиа — Галтәи 1-тәи а школ,
Кәарҷиаԥҳа Анна — Гагратәи 1-тәи абжьаратә школ,
Ҭарба Алмас — Аҟәатәи 10-тәи ашкол,
Тевренчиди Николь — Аҟәатәи 5-тәи ашкол,
Пекливониан Диана — Бзыԥтәи 2-тәи ашкол.
Аолимпиада еиҿкаан Армавиртәи аҳәынҭқарратә педагогикатә университет, аурыс поет Сергеи Есенин диижьҭеи 130 шықәса аҵра иазын.
Аиааира згаз 15-ҩык Анапа Урыстәылазегьтәи ахәыҷтәы центр "Смена" аҿы имҩаԥысраны иҟоу аурыс бызшәеи акультуреи Жәларбжьаратәи афестиваль иалахәхоит.