АҞӘА, жьҭаара 21 – Sputnik. Аԥсны Жәлар рышәҟәыҩҩы Платон Бебиа имемориалтә ӷәы аадыртит Аҟәа.
Иара кыдырҵеит ашәҟәыҩҩы дахьынхоз Аиааиреиа Џьонуеи амҩадуқәа реихысырҭаҿ игылоу аҩны аҿы.
Амемориалтә ӷәы авторс дамоуп еицырдыруа аԥсуа скульптор Адгәыр Ҷкадуа.
Аусмҩаԥгатә рхы аладырхәит Аԥсны Ршәҟәыҩҩцәа реидгылеи, ақалақь ахадареи, Ауаажәларратә палатеи, аԥсуа интеллигенциеи рхаҭарнакцәа, Аԥснытәи аҳәынҭқарратә университет арҵаҩцәеи астудентцәеи, ашәҟәыҩҩы иҭынхацәа.
Иара убас, иахьа Аԥсны амилаҭтә библиотекаҿы имҩаԥгахоит Платон Бебиа ирҿиара иазку аиубилеитә хәылԥазы.
Платон Бебиа — апоет, апрозаик, апублицист, Ахьӡ-Аԥша аорден III аҩаӡара занашьоу. Иԥсҭазаара далҵит 2021 шықәса цәыббрамза 26 рзы, 86 шықәса дшырҭагылаз. 2025 шықәса жьҭаарамза 5 рзы 90 шықәса ихыҵуазаарын.