АҞӘА, жьҭаара 22 – Sputnik. Аԥсны ахада Бадра Гәынба "Алаф клаб" аиубилеитә хәылԥазы даҭааит. Абри атәы аанацҳауеит атәыла ахада ипресс-маҵзура.
КВН акоманда "Аԥснытәи Нарҭаа" аԥҵоуижьҭеи 25 шықәса ахыҵреи "Алаф клаб" аԥҵоуижьҭеи 15 шықәса ахыҵреи ирызкыз аусмҩаԥгатә мҩаԥысит аныҳәатә ҭагылазаашьа аманы.
Иара убас, ахәылԥаз иалахәын атәыла ахада иԥшәмаԥҳәыс Ирма Ҳашыгԥҳа, атәыла ахада ихаҭыԥуаҩ Беслан Бигәаа, аԥыза-министр Владимир Делба, атәыла аиҳабыра алахәылацәа.
"Аԥснытәи Нарҭаа" ахәаԥшцәа ирыдыргалеит рномерқәа аҟынтәи иалкаақәоу ирҿыцны, иара убас ҷыдала аиубилеи иаздырхиази.
Аҳәынҭқарра ахада акоманда алахәылацәа аиубилеи рыдныҳәало иазгәеиҭеит, амилаҭтә культура аҿиареи Аԥсны аӡыргареи рҿы рлагала. Бадра Гәынба иажәақәа рыла, "Аԥснытәи Нарҭаа" рҟазара атәыла азы ииашаҵәҟьоу брендны иҟалеит, уи амилаҭтә ҷыдаҟазшьеи ажәлар рылафҳәаратә цәанырреи аанарԥшуеит.