АҞӘА, ажьырныҳәа 27 — Sputnik. Ареспубликатә ашьа-датә центр Аԥсны араионқәа зегьы рҟынтәи апациентцәа ацхыраара рнаҭоит ҳәа еиҭеиҳәеит ацентр анапхгаҩы Дамеи Џьопуа.
Иара иажәақәа рыла, ацентри араионтә хәышәтәырҭақәеи иааиԥмырҟьаӡакәа еимадоуп, апациент иаарласны иҭатәызар, иаразнакы Аҟәаҟа днаганы 20 минуҭ рыҩнуҵҟа аԥҟарҭа дықәырҵоит иҳәеит иара Аԥсуа телехәаԥшра аефир аҟны.
"Акардиологиатә хырхара иаҵанакуа апациент, шамахамзар, идыррақәа ҳзаарышьҭуеит, иҷаԥшьо акардиолог ма апациент дахьыҟо аҭыԥ аҿы ахәышәтәразы даанижьуеит, мамзаргьы, иаҭахны иҟазар, лассыла ашьа-датә центр ахь диаганы адунеитә бжьгарақәа инарықәыршәаны ацхыраара ирҭарц аӡбра идикылоит", — инаҵшьны иазгәеиҭеит Џьопуа.
Ареспубликатә шьа-датә центр анаадырт инаркны аоперациа рызууп 90-ҩык инареиҳаны апациентцәа. Урҭ рҟынтәи 30% иаалырҟьаны иҟалаз хҭысқәоуп.
Апациентцәа реиҳарак акардиологиатә чымазаҩцәа роуп, иара убас зшьапқәа аишемиа рымоу роуп ҳәа азгәаҭоуп Аԥсуа телехәаԥшра анҵамҭаҿы.